Rreth Nesh

Hiking Njeri është organizatë e regjistruar, e formuar me qëllim të promovimit të bukurive natyrore të Kosovës përmes ecjeve të organizuara, fotografive, videove, botimit të librave dhe projekteve të ndryshme.

Bëhuni pjesë e ekskurzioneve të organizatës tonë dhe shijoni bjeshkët dhe natyrën e Kosovës. Ecjet tona zakonisht i organizojmë të Dieleve por edhe të Shtuneve. Me marrevëshje mund të organizojmë ecje edhe gjatë ditëve të javës.

Sezona e ecjeve fillon kah fillimi i muajit mars dhe vazhdon deri në fund të vitit. Lajmërimet tona i postojmë në linkun "aktivitetet" por edhe faqet tona në facebook dhe instagram si: Kosovo Hiking Trips dhe Hiking Njeri. Për të marrë më shumë informata rreth ecjeve shkruani në e-mailin tonë (shikoni linkun "kontakt"). 

Kosova ka më shumë se 200 bjeshkë ndërsa Hiking Njeri i ka vizituar ato nga të gjitha anët por edhe gjatë stinëve të ndryshme. Ekskurzionet tona i organizojmë në atë menyrë që për mundësinë e ecjes dhe destinacionin e rradhës vendosim disa ditë përpara. Këtë e bëjmë duke marrë parasysh prognozën e motit dhe numrin e njerëzve të interesuar. Nuk kemi orar vjetor të ecjeve por destinacionet i caktojmë javë për javë.

Shumica dërmuese e organizimeve bëhet me autobus ndërsa në disa raste kur shkojmë në terrene më të vështira, bëhet me xhipa dhe kombi. Çmimet dallojnë nga lloji i aktivitetit dhe sillet nga 10 EU për person për një ditë me autobus, 20 EU për person për një ditë me xhip dhe të ndryshme për aktivitete më të largëta ose disa ditore. Çmimet për shërbimet tjera zakonisht i qesim në lajmërimet tona në linkun "aktivitetet". Në të gjitha variantet në çmim hyn vetëm transporti me guida. 

 

Çfarë paisje duhet të keni për Hiking / Ecje / Ngjitje ?

Për të qenë pjesë e organizimeve tona është me rëndesi të keni cokulla (Pllanika / kepucë për dimër), xhaketë kundër shiut dhe të ftohtit, çantë shpine dhe kapelë. 

Mirë është të keni edhe ndonjë duks, fanelë / maicë ekstra, dorëza (gjatë dimrit ose në ditët e ftohta), shkopinjë për ecje (vetëm nëse doni pasi e lehtëson ecjen), kremë kundër diellit. 

Gjithashtu, duhet të keni parasysh se ecjet nganjëherë zhvillohen (gjatë zbritjes) edhe natën kështu që duhet të keni llampë dore.

Veshjembathja në Hiking dallon shumë gjatë stinëve të ndryshme kështu që këshillat tona i postojmë gjatë lajmërimeve për ecjen e rradhës.

Çfarë ushqimi duhet të merrni me veti për hiking ?

Ushqimi në hiking mund të jetë i shumëllojshëm. Preferohet që mengjesi të jetë i lehtë (ndonjë sanduiq, kifle) pastaj gjatë pushimeve të kohëpaskohshme mund të hani shujta të vogla me ushqim që pregaditni ose e bleni vet. Ushqimi i preferuar gjatë ecjes mund të jetë: molla, bananja, mandarinat ose portokajt, pemë të ndryshme, kikirikat, bajamet, fruta të thata, perime etj. Uji është pija e preferuar ndërsa duhet t'i iket lëngjeve të gazuara. Shujta kryesore zakonisht bëhet në maje të malit, në cakun e ecjes ose në vendin, të cilin e cakton organizatori ose krye guida (ciceroni). Gjatë shujtës kryesore mund të konsumohet më shumë dhe më gjatë. Për llojin e ushqimit vendosë secili për veti. 

Për të mësuar më shumë rreth bjeshkëve dhe natyrës së Kosovës mund ti shiqoni fotografitë, videot dhe albumet tona në linqet: "galeria", "videos", "bjeshkët e Kosovës", në facebook dhe Instagram (Kosovo Hiking Trips) ose ta bleni librin e dytë të Hiking Njerit, Kosova Madhështore Vol.1" www.hikingnjeri.com.

 

 

 

Disa fakte rreth Hiking Njerit

Aktiviteti i parë organizatës sonë daton nga prilli 2004 dhe nga ajo kohë janë realizuar më shumë se 530 ekskurzione. Gjatë kësaj periudhe janë bërë rreth 2 milione foto dhe video, janë botuar 2 libra (Pure Kosovo në 2012 dhe Majestic Kosovo Vol.1 në 2014) dhe është punuar në shumë projekte rreth turizmit malor të Kosovës. Ne fillim te vitit 2008, ideatori dhe krijuesi i Hiking Njerit Ben Islami me bashkëkrijuesin dhe perkrahësin, Lorik Haxhiun, e regjistruan organizatën si OJQ.

Aktiviteti i parë i Hiking Njerit filloi pa plan paraprak. Më 5 prill 2004 krijuesi i organizatës për skijim dhe snowboardim alternativ "Snow Njeri", Ben Islami, bashkë me disa shokë shkuan për të skijuar në Brezovicë. Atë ditë për arsye të panjohura teleferiqet nuk punuan anipse kishte borë me bollëk. Për ta përmbushur ditën, skitarët vendosën që të ecin deri te stacioni i fundit i liftit në Livadh të ski qendrës. Pas përjetimit fenomenal gjatë ecjes, me të kthyer në Prishtinë, Beni vendosi që ta formoj dhe ta quan grupin e ri Hiking Njeri.